Ferðafélagið Hörgur heimasíða

    Starfsskýrsla formanns, fyrir árið 2010

Ferðafélagið Hörgur hefur starfað við Eyjafjörð vestanverðan á milli Akureyrar og Svarfaðardals. Við stofnun félagsins árið 1981 voru sveitarfélögin á starfssvæðinu fjögur og vegna þess að Hörgá snerti öll sveitarfélögin var nafnið Ferðafélagið Hörgur valið. Sveitarfélögin voru Glæsibæjarhreppur, Öxnadalshreppur, Skriðuhreppur og Arnarneshreppur. Nú hafa þessi sveitarfélög verið sameinuð í sveitarfélagið Hörgársveit og gæti nafn félagsins nú verið Ferðafélag Hörgársveitar. Félagar eru um 40 talsins.

Starfsemi félagsins er ekki viðamikil og fremur svipuð frá ári til árs. Gönguferð að torfbænum Baugaseli í Barkárdal á sumardaginn fyrsta, 22. apríl, markar oftast upphaf starfsársins. Að þessu sinni voru göngumenn 10 talsins. Aðalfundur var haldinn 18. júní og er stjórnin félagsins óbreytt: Formaður er Bjarni E. Guðleifsson á Möðruvöllum, gjaldkeri Gestur Hauksson frá Þríhyrningi og ritari Guðmundur Skúlason á Staðarbakka. Á Fífilbrekkuhátíð að Hrauni í Öxnadal, 13 júní gengu 16 manns upp á Halllok, sem er fjallsendinn norðan við Hraundranga. Þetta var sameiginleg ganga Ferðafélagsins Hörgs, Ferðafélags Akureyrar og Menningarfélagsins Hrauns í Öxnadal. Í árlegri sólstöðugöngu á Staðarhnjúk í Möðruvallafjalli voru 22 þátttakendur og um 50 manns komu á jónsmessuvöku í Baugaseli sem einnig er árlegur viðburður. Í ágúst var svo efnt til vatnagangna í Öxnadal og Hörgárdal. Þann 6. ágúst var gengið að Þverbrekkuvatni í Öxnadal og 12 manns gengu svo 7. ágúst að Grænavatni á Ásgerðarstaðaheiði í Hörgárdal og sex manns að Hraunsvatni í Öxnadal þann 8. ágúst. Loks tók Ferðafélagið þátt í sameiginlegri og árlegri árshátíð fimm félagasamtaka á svæðinu en hún fór fram fyrsta vetrardag, 23. október.

Svipuð dagskrá er ráðgerð á næsta ári. Þá er reyndar hugmyndin að ganga í ágúst að fjórum vötnum í Svarfaðardal. Í tilefni af þrítugsafmæli félagsins er ráðgerð kvöldvaka í haust. Einnig má geta þess að ráðgert er að gera átak í að lagfæra bæinn í Baugaseli, en honum hefur lítið verið haldið við síðann hann var endurreistur á níunda tug síðustu aldar. Er von á hópi erlendra sjálfboðaliða á vegum samtakanna SEEDS til að taka þátt í þeirri vinnu í júlí, en Ferðafélagið þarf að sjá um verkstjórn og útvega fæði og húsnæði. Er vonst til að félagsmenn geti lagt hönd á plóginn í þessu verki.

    Bjarni E. Guðleifsson